मकवानपुर । नेकपा एमाले मकवानपुरबाट केन्द्रीय सदस्यका लागि दावी गर्दै चुनावमा होमिएका पाँच जना नेताहरु विजयी भएका छन् ।
काठमाडौंमा सम्पन्न नेकपा एमाले ११ औँ महाधिवेशनको अन्तिम चुनावी मत परिणाम सार्वजनिक भएसँगै केन्द्रीय सदस्यमा भारती पाठक, रामेश्वर राना, महेश बर्ताैला, एकालाल श्रेष्ठ र नवीन सिग्देल वीजयी भएका हुन् ।
यी पाँचै जना अध्यक्षमा निर्वाचित भएका केपी ओली प्यानलका हुन् । त्यसोत, मकवानपुरबाट केन्द्रीय सदस्य पदमा ७ जनाको दावी रहेको थियो । यी मध्ये कृष्ण दाहाल र देवकृष्ण विक पराजित भएका छन् । पराजित यी दुई नेताले भने वरिष्ठ उपाध्यक्ष ईश्वर पोखरेल प्यानलबाट उम्मेद्वारी दिएका थिए ।
बागमती प्रदेश सभाकी सदस्यसमेत रहेकि पाठकले (महिला) क्लस्टरमा उम्मेद्वारी दिएकी थिइन् । उनले १ हजार ९१५ मत प्राप्त गरेकी छन् ।
मकवानपुरको क्षेत्र नम्बर–२ बाट निर्वाचित संघीय सांसद महेश बर्तौलाले सदस्य(खुल्ला) मा उम्मेद्वारी दिएका थिए भने, नेकपा एमाले मकवानपुरका इन्चार्ज रानाले प्रदेश भूगोल सदस्य (खुल्ला) मा उम्मेद्वारी दिएका थिए ।
सांसद बर्तौलाले १ हजार ५२९ मत प्राप्त गरेका छन् भने , रानाले १ हजार ४९८ मत प्राप्त गरेका छन् ।
त्यस्तै बागमती प्रदेश सभा सदस्य एकालाल श्रेष्ठले आदीवासी जनजाति (खुल्ला) मा उम्मेद्वारी दिएका थिए । उनले १ हजार ५०९ मत प्राप्त गरेका छन् । यसअघि नेकपा एमाले प्रदेश कमिटिमा रहेका श्रेष्ठ अब केन्द्रीय कमिटिको भूमिकामा देखिनेछन् ।
यता, हेटौँडा–४ का वडा अध्यक्ष समेत रहेका सिग्देलले केन्द्रीय लेखा आयोग सदस्यमा दावी गर्दै चुनावमा होमिएका थिए । उनले कुल १ हजार ६१४ मत ल्याएर विजयी भएका हुन् । लेखा आयोग सदस्यमा निर्वाचित भएका सिग्देल एमाले मकवानपुरका पूर्व सचिव समेत रहेका छन् ।
त्यसोत, यसअघि चितवनमा भएको १० औँ महाधिवेशनबाट केन्द्रीय सदस्यमा निर्विरोध चुनिएका रामेश्वर राना, भारती पाठक यसपटक पनि सदस्यमानै निर्वाचित भएका हुन् ।
१० औँ महाधिवेशनमा सदस्यमा नेतृत्वको लिस्टमा नअटाएका बर्तौलाले यसपटक चुनाव लडेर केन्द्रीय सदस्यमा जित हाँसिल गरेका हुन् ।
