मकवानपुर । नेपाल मोबाईल व्यवसायी महासंघ (म्यान)को तेस्रो केन्द्रीय महाधिवेशन तथा पाँचौं साधारणसभा आगामी जेठ १ र २ गते काठमाडौंमा हुने भएको छ ।
महाधिवेशनको तयारीस्वरूप हेटौंडामा आयोजित पत्रकार सम्मेलन कार्यक्रममा मकवानपुरबाट विभिन्न पदमा उम्मेदवारी घोषणा गरिएको छ ।
महासंघका अनुसार हाल देशभर ७ प्रदेश र ७० जिल्लामा शाखा विस्तार भइसकेको छ भने करिब २७ हजार ४ सय व्यवसायी आबद्ध रहेका छन् ।
यसलाई व्यवसायिक दृष्टिले ठूलो समूहका रूपमा हेरिएको छ ।
महाधिवेशनबाट नयाँ नेतृत्व चयन गरिने क्रममा मकवानपुरबाट पनि प्रतिनिधित्व बढेको जनाइएको छ । हेटौंडाबाट कुल १२५ सदस्य मध्ये ७ जना प्रतिनिधि महाधिवेशनमा सहभागी हुने भएका छन् ।
महासचिव पदमा मकवानपुरबाट छ्तेन्द्र आचार्यले उम्मेदवारी घोषणा गरेका छन् भने केन्द्रीय सदस्य पदमा नवराज चौलागाईं र मिलन स्याङ्तानले उम्मेदवारी दिने घोषणा गरेका छन् ।
महाधिवेशनबाट ५५ सदस्यीय केन्द्रीय कार्यसमिति चयन हुने जनाइएको छ । विधानअनुसार अध्यक्ष १, निवर्तमान अध्यक्ष १, वरिष्ठ उपाध्यक्ष १, उपाध्यक्ष ७, महासचिव १, कोषाध्यक्ष १, सचिव ४ सहित सह कोषाध्यक्ष १ गरि अन्य पदाधिकारी चयन गरिने व्यवस्था रहेको छ ।
त्यस्तै, प्रत्येक प्रदेशबाट २ जनाका दरले १४ जना, संस्थापक सदस्यबाट १४ जना, बागमती प्रदेशबाट ५ जना तथा अध्यक्षबाट मनोनीत ५ जना कार्यसमितिमा रहने उल्लेख गरिएको छ ।
महाधिवेशन उद्घाटन कार्यक्रम जेठ २ गते राष्ट्रिय सभागृह, प्रदर्शनीमार्गमा हुने तथा त्यसअघिको दिन जेठ १ गते ह्वाइट पार्टी प्यालेस कौशलटारमा , काठमाडौंमा बन्दसत्र आयोजना गरिने कार्यक्रम रहेको छ ।
आफू निर्वाचित भएपछिको दुई वर्षीय कार्यकालमा सचिवालयको व्यवस्थापनमा मुख्य जोड दिने योजनाका साथ महासचिव पदमा उम्मेद्वारी घोषणा गरेको छतेन्द्र आचार्यले बताएका छन् ।
