मकवानपुर। सडक डिभिजन कार्यालय हेटौंडाले सुरु गरेको सडक विस्तारका क्रममा ५१० बढी संरचना भत्किएका छन् ।
हेटौंडा उपमहानगरपालिका क्षेत्रभित्र पर्ने महेन्द्र राजमार्ग र त्रिभुवन राजपथको सडक सीमा केन्द्र रेखादेखि २५–२५ गजभित्र बनेका स्थायी तथा अस्थायी प्रकृतिका ५१० बढी घरटहरा भत्किएका हुन् ।
हिजो शनिबार उक्त सडक सीमाभित्र पर्ने संरचना खाली गर्न दिइएको १५ दिने अल्टिमेटम सकिएसँगै सडक डिभिजन कार्यालयले संरचना भत्काउन सुरु गरेको हो । जसमा शनिबार डिभिजन कार्यलयका झण्डै ६/७ वटा डोजर र स्काभेटरको प्रयोग गरेर ५ सय बढी सुरक्षाकर्मीको उपस्थितिमा ५१० बढी संरचना भत्किएका छन् ।
हाल कुल कति संरचना भत्किए भन्ने यकिन डाटा संकलन नभइसकेको भएपनि ५१० बढी संरचना भत्किएका सडक डिभिजन कार्यालयको अनुमान छ ।
कार्यालयका अनुसार ५१० मध्ये १०/१५ संरचनाहरु घरधनी स्वयमले भत्काएका छन् ।
कार्यालयका अनुसार यसबाहेकका २१ घर टहराहरु भत्किन बाँकी रहेका छन् । त्रिभुवन राजपथको चौकीटोल क्षेत्रका केहि स्थानमा सडक सीमामा निर्माण भएका घर टहरा हटाउन बाँकी रहेको कार्यालयले जनाएको छ ।
त्यसोत बाँकी रहेका संरचना घरधनी स्वयमले भत्काउने भएपछि आईतबार डिभिजनले सडक विस्तारको क्रमलाई यथावत् राखेको छ । कार्यालयका अनुसार अब भत्किएका संरचनालाई कसरी व्यवस्थित गर्ने भन्ने योजनालाई अगाडि बढाइएको छ ।
शनिबार हेटौंडा १५ रातोमाटेदेखि मुख्य बजार क्षेत्रको मेनरोड बुद्ध चोक, राप्ती रोड, पिपल बोट तथा चौकीटोल ओरालो सम्मका संरचना हरु भत्काइएको थियो ।
जहाँ सोहि सीमा क्षेत्र भित्र पर्ने संरचना भत्काउने क्रममा सीमाभित्र परेका नेपाल राष्ट्र बैंक लिमिटेड, हिमालयन बैंक, र तीन वटा पेट्रोल पम्प पनि भत्किएका छन्।
सडक विस्तारका क्रममा बुद्ध चोक, मेनरोड र फरेष्ट्री क्षेत्रका २५ बढी अशोकका बोटहरु समेत मासिएका छन् ।
