मकवानपुर । काठमाडौंमा जारी नेकपा (एमाले) को ११ औँ राष्ट्रिय महाधिवेशनमा मकवानपुरबाट प्रतिनिधि भएर गएका १७ मध्ये ६ जना नेताले केन्द्रीय सदस्य पदका लागि उम्मेदवारी दिएका छन् ।
मकवानपुरबाट प्रतिनिधि बनेर गएका १७ मध्ये रामेश्वर राना, महेश बर्तौला, भारती पाठक, एकालाल श्रेष्ठ, कृष्ण दाहाल र देवकृष्ण विकले केन्द्रीय सदस्य पदमा उम्मेद्वारी दर्ता गराएका हुन् ।
बागमती प्रदेश सभाकी सदस्यसमेत रहेकि पाठकले (महिला) क्लस्टरमा उम्मेद्वारी दिएकी हुन् ।
मकवानपुरको क्षेत्र नम्बर–२ बाट निर्वाचित संघीय सांसद महेश बर्तौलाले सदस्य(खुल्ला) मा उम्मेद्वारी दिएका हुन् भने , नेकपा एमाले मकवानपुरका इन्चार्ज रानाले प्रदेश भूगोल सदस्य (खुल्ला) मा उम्मेद्वारी दिएका हुन् ।
त्यस्तै बागमती प्रदेश सभा सदस्य एकालाल श्रेष्ठले समावेशी जनजाति (खुल्ला) मा उम्मेद्वारी दिएका छन् ।
यी चारै नेताले नेकपा एमालेका अध्यक्ष केपी शर्मा ओली प्यानलबाट उम्मेद्वारी दिएका हुन् ।
यता केन्द्रीय सदस्य कृष्ण दाहालले खुल्ला सदस्यतर्फ उम्मेद्वारी दिएका छन् भने देवकृष्ण विकले (दलित) क्लस्टरतर्फ उम्मेद्वारी दिएका छन् ।
यी दुई नेताले भने वरिष्ठ उपाध्यक्ष ईश्वर पोखरेल प्यानलबाट उम्मेद्वारी दिएका हुन् ।
त्यसोत, यसअघि चितवनमा भएको १० औँ महाधिवेशनबाट केन्द्रीय सदस्यमा निर्विरोध चुनिएका रामेश्वर राना, भारती पाठक र कृष्ण दाहाल यसपटक पनि सदस्यमानै दोहोरिने योजना बनाएका छन् ।
१० औँ महाधिवेशनमा सदस्यमा नेतृत्वको लिस्टमा नअटाएका बर्तौलाले यसपटक पनि केन्द्रीय सदस्यमा उम्मेद्वारी दिएका हुन् ।
गत मंसिर २७ बाट सुरु भएको महाधिवेशनका लागि मकवानपुर निर्वाचन क्षेत्र नम्बर– १ बाट अणराज जर्गा मगर, नवीन सिग्देल, फुर्वादोर्जे लामा, सुनिल मोक्तान, आरती पाठक, विना कुमारी थिङ, सीता विष्ट र बोलबहादुर कार्की प्रतिनिधि चयन भएर काठमाडौं पुगेका छन् ।
यस्तै, निर्वाचन क्षेत्र नम्बर– २ बाट हिदम लामा, एकालाल श्रेष्ठ, बलराम बल, भगवती पुडासैनी, रोहण लामा, सुमित्रा काफ्ले, विदुर हुमागाईँ, गीता काफ्ले र देवकृष्ण विक निर्विरोध रूपमा प्रतिनिधि चयन भएर हाल महाधिवेशन स्थलमा प्रतिनिधिको रुपमा पुगेका छन् ।
यसैबीच, नेकपा एमालेको अध्यक्ष पदमा केपी शर्मा ओलीले उम्मेदवारी दर्ता गराएका छन् । वरिष्ठ उपाध्यक्ष ईश्वर पोखरेलले अध्यक्ष पदमा उम्मेदवारी दर्ता गराएपछि ओलीले पनि सोमबार महाधिवेशन स्थल भृकुटीमण्डप पुगेर आफ्नो उम्मेदवारी दर्ता गराएका हुन् ।
महाधिवेशन अन्तर्गत नयाँ नेतृत्व चयनका लागि मङ्गलबार मतदान गर्ने तयारी गरिएको छ ।
