मकवानपुर । मकवानपुरको भीमफेदी गाउँपालिका–६ जुरीखेतस्थितभीमफेदी–कुलेखानी–काठमाडाैं सडकखण्डमा सुमो गाडी दुर्घटना हुँदा ९ जना घाइते भएका छन्।
इलाका प्रहरी कार्यालय भीमफेदी, मकवानपुरका अनुसार आइतबार साँझ करिब ५ः२० बजे काठमाडाैंबाट हेटौंडातर्फ आउँदै गरेको ना.१ ज १७७८ नम्बरको सुमो गाडी अनियन्त्रित भई सडकबाट करिब १०० मिटर तल खोल्सामा खस्दा दुर्घटना भएको हो।
दुर्घटनाको खबर प्राप्त हुनासाथ इलाका प्रहरी कार्यालय भीमफेदीबाट प्रहरी टोली करिब ५ः३० बजे घटनास्थलमा पुगेर उद्धार कार्य गरेको प्रहरीले जनाएको छ।
सुमोमा ६ जना पुरुष, १ महिला, १ बालक र १ बालिका गरी ९ जनालाई उद्धार गरी उपचारका लागि हेटौंडास्थित हेटौंडा अस्पतालमा भर्ना गरिएको छ ।
घाइतेमध्ये ७ जनाको अवस्था गम्भीर र २ जना (बालक र बालिका) को अवस्था मध्यम रहेको प्रहरीले जनाएको छ।
दुर्घटनाग्रस्त सुमो गाडी घटनास्थलमै रहेको छ।
दुर्घटनास्थल इलाका प्रहरी कार्यालय भीमफेदीबाट करिब ३ किलोमिटर उत्तर–पूर्व दिशामा पर्ने जनाइएको छ।
दुर्घटनाबारे थप अनुसन्धान भइरहेको प्रहरीले जनाएको छ।
