हेटौंडा/चितवनको भरतपुरमा भएको २ दिने पत्रकार महिला भेलाले १२ बुँदे घोषणापत्र जारी गरी समापन भएको छ । नेपाल पत्रकार महासंघ बागमती प्रदेशको आयोजनामा भएको पत्रकार महिला भेला घोषणापत्र जारी गरी सम्पन्न भएको हो ।
पहिलो दिन महिला पत्रकाहरुको अवस्था, चुनौती र अवसरबारे चर्चा गर्दै शुरु भएको भेलामा शनिबार दोस्रो दिनमा चितवन घोषणापत्र जारी गरेको थियो । कार्यक्रममा अधिकांश वक्ताहरुले महिला पत्रकारलाई अवसरसँगै चुनौतीहरु पनि धेरै भएको बताएका छन् ।
अझै पनि पत्रकार महिलालाई सहजरुपमा काम गर्ने वातावरण नभएको उनीहरुले बताएका थिए । कार्यालयमा महिला पुरुषमा हुने भेदभाव, हिंसा, विभिन्न किसिमका घटना, पारिश्रमिक, वैवाहिक जीवन, वैदेशिक रोजगारी र समयअभाव लगायत कारण पत्रकार महिलालाई टिकाइराख्नु ठूलो चुनौती भइरहेको वक्ताहरुले बताए ।
नेपाल पत्रकार महासंघ बागमती प्रदेश महिला उपाध्यक्ष बिमला पाण्डेको सभाध्यक्षतामा भएको कार्यक्रममा केन्द्रीय बरिष्ठ उपाध्यक्ष दीपक आचार्यको प्रमुख अतिथ्यता थियो । भेलाको दोस्रो दिन नेपाल पत्रकार महासंघ उपाध्यक्ष नितु पण्डितले पत्रकार महिलालाई विभिन्न चुनौतीहरु भए पनि अवसर पनि भएको बताइन् ।
उनले बिगतका दिनमा आफूले गर्दै आएका कामबारे बताउँदै पत्रकारिता क्षेत्रमा धेरै अवसर पनि भएको अनुभव सुनाइन् । कार्यक्रमा नेपाल पत्रकार महासंघ प्रदेश अध्यक्ष कृष्ण सारुमगरसहित कार्यसमिति सदस्य तथा जिल्लाका पत्रकारको उपस्थिति थियो ।
