मकवानपुर। बागमती प्रदेशका मुख्यमन्त्री इन्द्रबहादुर बानियाँले मकवानपुर कांग्रेसमा कुनै पनि प्रकारको विवाद नरहेको स्पष्ट पारेका छन् ।
कांग्रेसभित्र भएको नियमित र विशेष महाधिवेशन नेतृत्वको स्वाभाविक प्रतिस्पर्धा मात्रै भएको र त्यो प्रक्रिया निर्वाचनकै क्रममा सम्पन्न भइसकेको उनको भनाइ छ ।
मंगलबार प्रतिनिधि सभा निर्वाचनका लागि मकवानपुर क्षेत्र नम्बर– १ र २ का कांग्रेस उम्मेद्वारहरुको मनोनयन दर्ता गराएपछि सञ्चारकर्मीसँग बोल्दै मुख्यमन्त्री बानियाँले अब टिकट बाँडफाँटको विषय टुंगिए लगतै त्यसअनुसार नेताहरूबीच एकता कायम भइसकेको बताए।
उनले भने , “ अब कांग्रेस एकताको बाटोमा हिडिसक्यो । टिकट लिएर नियमित अधिवेशन खोज्ने र विशेष महाधिवेशन रोज्ने सबै नेताबीच एकता भइसकेको छ । ”
बागमती प्रदेश सभापतिको हैसियतले दुवै उम्मेद्वारलाई समेटेर अघि बढिसकेको उल्लेख गर्दै मुख्यमन्त्री बानियाँले कांग्रेसको जित सुनिश्चित रहेको दाबी गरे ।
कांग्रेस एकताबद्ध भएर निर्वाचनमा होमिएको र मकवानपुरमा पार्टीको जित पक्का रहेको मुख्यमन्त्री बानियाँको दावी रहेको छ ।
आगामी फागुनमा हुने प्रतिनिधि सभा निर्वाचनका लागि नेपाली कांग्रेसको तर्फबाट मकवानपुर क्षेत्र नम्बर– १ बाट डिना उपाध्याय र क्षेत्र नम्बर– २ बाट बुद्ध लामाले मनोनयन दर्ता गराएका छन्। मुख्यमन्त्री बानियाँको उपस्थितिमा उम्मेद्वारहरुको मनोनयन दर्ता गरिएको हो ।
पार्टीकी निवर्तमान सहमहामन्त्रीसमेत रहनुभएकी पूर्वमन्त्री महालक्ष्मी उपाध्याय (डिना) र २ नम्बर क्षेत्रबाट पार्टी जिल्ला सभापति बुद्ध लामालाई कांग्रेस मकवानपुरले उम्मेद्वार बनाएको हो ।
डिना २०७९ को प्रतिनिधिसभा निर्वाचनमा पनि १ नम्बर क्षेत्रबाट उम्मेद्वार बनेकी थिइन् । सो बेला उनी राप्रपाका दिपक सिंहसँग पराजित भएकी थिइन् ।
यसैगरी, जिल्ला सभापति लामा पहिलो पटक प्रतिनिधिसभा निर्वाचन लड्दैछन् । लामाले २ नम्बर क्षेत्रबाट ठूला दल नेकपा एमालेका महेश बर्ताेला र नेपाली कम्युनिस्ट पार्टी(नेकपा) का लवशेर विष्टसँग प्रतिस्पर्धा गर्नुपर्नेछ ।
