मकवानपुर। बागमती प्रदेश निर्माण व्यवसायी महासंघले इन्धन तथा निर्माण सामग्रीमा भएको अस्वाभाविक मूल्यवृद्धिका कारण निर्माण क्षेत्र गम्भीर संकटमा परेको जनाएको छ ।
महासंघले सोमबार हेटौंडामा पत्रकार सम्मेलनमार्फत जारी गरेको प्रेस विज्ञप्तिमा यस्तो अवस्था कायम रहे निर्माण उद्योग पूर्ण रुपमा ठप्प हुने चेतावनी दिएको छ ।
महासंघका अनुसार मध्यपूर्वमा जारी द्वन्द्वका कारण डिजेल, पेट्रोल, मट्टीतेललगायत इन्धनको मूल्य लगातार बढिरहेको छ । यसको प्रत्यक्ष असर बिटुमिन, सिमेन्ट, डण्डी जस्ता निर्माण सामग्रीमा परेको र बजारमा अभावसमेत देखिएको विज्ञप्तिमा उल्लेख छ ।
महासंघले यस अवस्थालाई ‘सुनामी’ जस्तै प्रभावकारी भन्दै पूर्वाधार क्षेत्र मात्र नभई समग्र अर्थतन्त्रमा समेत गम्भीर असर पर्न थालेको जनाएको छ । निर्माण कार्य सुस्त हुँदा लाखौं श्रमिक र यससँग सम्बन्धित अन्य उद्योगहरु आर्थिक रुपमा प्रभावित भएको महासंघको ठहर छ ।
महासंघका अध्यक्ष छत्र बहादुर तामाङले निर्माण व्यवसायीहरुलाई तत्काल राहत दिन र उद्योग ध्वस्त हुनबाट जोगाउन सरकारसँग आग्रह गर्नुभएको छ । “हामी सरकारसँग आन्दोलनको बाधयात्मक स्थिति सिर्जना नगर्न आग्रह गदछौं । ” उहाँले भन्नुभयो ।
सरकारसँग पटक–पटक ध्यानाकर्षण गराए पनि ठोस समाधान नआएको गुनासो गर्दै महासंघले यसप्रति गम्भीर भएर तत्काल कदम चाल्न माग गरेको छ । विशेषगरी, राष्ट्र बैंकको सूचकाङ्कअनुसार हुने मूल्य समायोजन प्रणाली व्यवहारिक नभएको भन्दै निर्माण सामग्रीको वास्तविक मूल्यअनुसार समायोजन गर्नुपर्ने माग गरिएको छ ।
महासंघले हालको परिस्थितिमा अधिकांश साना–ठूला आयोजना प्रभावित भई काम ठप्प हुने अवस्थामा पुगेको जनाएको छ । साथै, तोकिएको समयमा आयोजना सम्पन्न हुन नसक्ने भएकाले बैंक ग्यारेन्टी, बीमा तथा क्षतिपूर्तिसहित म्याद थपका लागि आवश्यक पहल गर्न सरकारसँग अनुरोध गरिएको छ ।
आईतबार आयोजित पत्रकार सम्मेलनमा बागमती प्रदेश निर्माण व्यवसायी महासंघका वरिष्ठ उपाध्यक्ष राजकुमार बुढाथोकी, उपाध्यक्ष्य उमानन्द कँडेल, कोषाध्यक्ष राजेन्द्र उप्रेती, सह कोषध्यक्ष दिल बहादुर बोम्जन लगायतको उपस्थिति रहेको थियो ।
