मकवानपुर । आसन्न प्रतिनिधिसभा निर्वाचनका लागि देशव्यापी मतदाता नामावली संकलन भइरहँदा मकवानपुरमा पनि उत्साहजनक रुपमा मतदाता नामावली संकलन अगाडि बढिरहेको छ ।
गत असोज ९ गतेदेखि सुरु भएको मतदाता नामावली संकलनमा बागमती प्रदेशको राजधानी हेटौँडामा रहेको प्रदेश निर्वाचन कार्यालयमा आएर उत्साहजनक रुपमा पछिल्ला पुस्ताका नागरिकहरु मतदाता नामावली दर्तामा सहभागि भइरहेका निर्वाचन अधिकारी प्रसाद ढकालले बताउनुभयो ।
सरकारले आगामी २१ फाल्गुनमा प्रतिनिधि सभा निर्वाचनको घोषणा गरेपछि हाल देशैभर मतदाता नामावली संकलन भइरहदा मकवानपुरमा पनि यसको उत्साह छाएको हो । सो निर्वाचनका लागि मतदाता नामावलीमा नाम दर्ता भएका मध्ये फाल्गुन २० गतेसम्म १८ वर्ष पूरा हुने मतदाताले मात्र मतदान गर्न पाउनेछन् ।
जसमा मकवानपुरमा आइतबारसम्म तीन हजार बढीले आफ्नो नामावली दर्ता गराइसकेको प्रदेश निर्वाचन अधिकारी ढकालले जानकारी दिनुभयो । त्यसोत, आइतबार मात्र झण्डै तीन सय जना बढी नामावली दर्ताका लागि यहाँ आएका हुन् ।
“मकवानपुरका दश वटै स्थानीय तहहरुबाटनै यहाँ मतदाता नामावली संकलनमा आउनुभएको छ । पछिल्लो पुस्तामा नागरिकहरु अझ उत्साहले यहाँ आउनुभएको छ । आज आइतबारसम्म तीन हजार बढी नँया मतदाता थपिनुहुन्छ । यो अवधिमा २३५ जनाको मत नामावली ठाउँसारी भएको छ । प्रायजसो यहाँबाट काठमाडौँ ठाउँसारी गर्ने मतदाता धेरै हुनुहुन्छ । यसअघि गत कात्तिक १६ सम्ममा १८ वर्ष पूरा भएका ३ लाख २ हजार २४३ र २०७९ को निर्वाचनमा ३ लाख ७३३ मतदाता रहनुभएको थियो ।” उहाँले भन्नुभयो ।
“जिल्लाको जनसंख्या र भौगोलिक परिवेश हेर्दा हालसम्मको नामावली संकलन संख्या सन्तोषजनकनै मान्न सकिन्छ । मतदाता नामावली संकलन निरन्तर प्रक्रिया हो । त्यसोत, स्थानीय तहको निर्वाचनमानै प्रायः सबै नागरिकले नामावली दर्ता गराइसकेका हुन्छन्, जसकारण नयाँ मतदातामा नामावलीमा छुटपुट र भर्खरै उमेर सीमा पुगेको नागरिकहरु रहनुभएको छ ।” उहाँले भन्नुभयो ।
उहाँका अनुसार अन्तिम मतदाता नामावली आगामी पुष १५ सम्ममा प्राप्त हुन्छ । मकवानपुरमा कति मतदाता थपिए? मतदान स्थल र मतदान केन्द्र कहाँ? भनेर पुष १५ मा प्रकाशन गरिने उहाँले बताउनुभयो ।
मतदाता नामावली प्रक्रिया आगामी कार्तिक ३० सम्म रहेकाले सो मितिसम्म अठार वर्ष उमेर पूरा हुने र नागरिकताको प्रमाणपत्र प्राप्त गरेका सबै नेपाली नागरिकलाई नाम दर्ता गराउन उहाँले आग्रह गर्नुभएको छ ।
मतदाता नामावली दर्तामा अधिक सहभागिताका कारण मतदाता नामावली दर्ता सर्भरमा अत्यधिक चाप पर्न गई सेवाग्राहीलाई सेवा लिन असहज भएको गुनासो आउने गरेको आयोगले जनाएको छ ।
त्यसोत, प्रतिनिधि सभा सदस्य निर्वाचन सम्पन्न भए पश्चात् विगतमा जस्तै १६ वर्ष उमेर पूरा भई नागरिकताको प्रमाणपत्र प्राप्त गरेका सबै नेपाली नागरिकले मतदाता नामावलीमा नाम दर्ता गर्न पाउने छन् ।
आईतबार हेटौैँडा– १७ निवासी सितु श्रेष्ठ आईतबार मतदाता नामावली दर्ताका लागि प्रदेश निर्वाचन कार्यालय हेटौँडा आउनुभएको छ । ४५ वर्षीय श्रेष्ठको लागि आउँदो निर्वाचन जीवनको पहिलो अनुभव रहनेछ । उहाँले यसअघिका चुनावमा कहिल्यै भोट हाल्नुभएको छैन । काठमाडौँको कोटेश्वरदेखि हेटौँडा बसाइसरेर आउनुभएकी श्रेष्ठले गत भदौमा जेनजी पुस्ताले गरेको आन्दोलन पश्चात् आगामी निर्वाचनमा आफूले मतदान गर्न पाउने अधिकार प्रयोग गर्ने सोच बनाउनुभयो । यूवाहरुके आन्दोलनलाई आफ्नो मताधिकार प्रयोग गरी योग्य प्रतिनिधि छान्ने सोच बनाएको उहाँले बताउनुभयो ।
त्यस्तै, मकवानपुरको मकवानपुरगढी गाउँपालिका वडा नम्बर–३ देखि मतदाता नामावली दर्ताका लागि आउनुभएका २० वर्षीय विश्वास लम्सालपनि उत्साहपूर्व कार्यालयको लाइनमा बस्नुभएको छ । उहाँ भन्नुहुन्छ “ जेनजी आन्दोलनले धेरै कुरा सिकाएको छ । पुरानै दलका उम्मेद्वार रहनुभयो भने हाम्रो ‘नो भोट’ हुनेछ । यदि आफूलाई चित्त बुझ्दो नँया दल, जसले हाम्रो पुस्ताको माग सम्बोधन गर्छ र चुनावमा उम्मेद्वार रहन्छ भने उहाँहरुलाई हाम्रो समर्थन रहनेछ ।”
