मकवानपुर । मकवानपुरको बकैया गाउँपालिका–८ शिशिरदमारस्थित एक कुखुरा फर्ममा आगो ताप्ने क्रममा कपडामा सल्किएर ५ वर्षीया बालिका घाइते भएकी छन् ।
चितवनको राप्ती नगरपालिका–१ लोथर घर भई हाल मकवानपुर बकैया गाउँपालिका–८ शिशिरदमारमा बस्दै आएका रमेश फुयाँलको कुखुरा फर्ममा कार्यरत दिलबहादुर प्रजाकी करिब ५ वर्षीया छोरी सोनिया प्रजा आगो ताप्ने क्रममा घाइते भएकी हुन् ।
प्रहरीका अनुसार मंगलबार बिहान करिब ९ बजे फर्मको कम्पाउन्डभित्र सँगै आगो तापेर बसिरहेकी बालिकाकी आमा सानुमाया प्रजा बाहिर निस्किएको बेला अचानक बालिकाको कपडामा आगो सल्किदा छाती र घाँटीमा पोलेको थियो ।
घाइते बालिकालाई उपचारका लागि आमा सानुमाया प्रजाले दिउँसो करिब १२ बजे हेटौंडा अस्पताल ल्याएकी थिइन् ।
अस्पताल स्रोतका अनुसार बालिकाको अवस्था मध्यम रहेको छ । घटनाबारे अस्पतालमा खटिएको प्रहरी कर्मचारीमार्फत जानकारी प्राप्त भएपछि इलाका प्रहरी चौकी हात्तिसुडे, मकवानपुरबाट प्रहरी टोली घटनास्थलतर्फ खटिएको जनाइएको छ ।
घटनास्थल प्रहरी चौकी हात्तिसुडेबाट करिब ५ किलोमिटर पूर्वतर्फ पर्दछ । घटनासम्बन्धमा थप अनुसन्धान भइरहेको प्रहरीले जनाएको छ ।
