मकवानपुर । मकवानपुरको कैलाश गाउँपालिकाले ‘चेली प्रोत्साहन कार्यक्रम’ अन्तरगत सात चेलीहरुलाई नगदसहित सम्मान गरेका छ ।
१२ कक्षा उत्र्तीर्ण पश्चात् २० वर्ष पुरा भएपछि मात्र विवाह गर्ने ७ जना चेलीहरुलाई नगद वीस हजार सहित सम्मान गरिएको होे ।
गाउँपालिकाको बिहिबार बसेको १७ औं गाउँ सभाले पालिकाका विभिन्न वडाका चेलीहरुलाई सम्मान गरेको हो ।
मकवानपुरको सबैभन्दा विकट पालिका कैलाशले गाउँमा मुल समस्याको रुपमा रहेको बाल विवाहलाई न्युनीकरण गर्नका लागि २०८० असार देखि चेली प्रोत्साहन कार्यक्रम सुरु गरेको थियो ।
विहिबार सम्मानित हुनेमा कैलाश– ९ की आइस्का थापा, कैलाश १० की कुमारीमाया स्याङ्तान र एस्तर प्रजा, कैलाश– १ की विमला थापामगर र रीता थापामगर, कैलाश– २ की पुष्पा प्रजा, र कैलाश –५ की सिर्जना दर्लामीमगर रहनु भएको छ ।
पालिकाले हालसम्म ४२ जना चेलीहरुलाई सम्मान गरिसकेको छ ।
भौगोलिक रूपमा विकट रहेको यस गाउँपालिकामा बालविवाहको समस्या न्यूनीकरण गर्ने उद्देश्यसहित यस कार्यक्रम अघि बढाइएको गाउँपालिकाका अध्यक्ष लोक बहादुर मुक्तानले बताउनुभएको छ ।
अध्यक्ष मुक्तानका अनुसार कार्यक्रमको मुख्य ध्येय पालिकाभित्रका चेलीहरूले कम्तीमा २० वर्ष उमेर पूरा गरेपछि मात्र विवाह गरुन् र न्यूनतम १२ कक्षा उत्तीर्ण गरेपछि विवाहप्रति आकर्षित होउन् भन्ने रहेको छ ।
साथै, यस कार्यक्रममार्फत छिमेकी पालिकाहरुलाई पनि यस्ता सकारात्मक कार्यक्रम अवलम्बन गर्न प्रेरित गर्ने लक्ष्य राखिएको उहाँले बताउनुभयो ।
कार्यक्रममा विशेषगरी कैलाश गाउँपालिकाभित्र बसोबास गर्ने तामाङ र चेपाङ समुदायका चेलीहरुलाई प्राथमिकतामा राखिएको छ ।
पालिकाको नीति तथा कार्यक्रममा समावेश गरी सञ्चालन गरिएको यस कार्यक्रमले कति चेलीहरु लाभान्वित भए भन्ने विषयमा प्रभावकारि मूल्यांकन गरिने अध्यक्ष मुक्तानले बताउनुभयो ।
उहाँका अनुसार हालसम्म कार्यक्रमले बालविवाह न्यूनीकरणमा सकारात्मक सघाउँ पु¥याएको पालिकाले अनुभूति गरेको छ ।
त्यसैले आगामी दिनमा पनि यस कार्यक्रमलाई निरन्तरता दिइने गाउँपालिकाले जनाएको छ ।
२ करोड ५१ लाख बजेट पारित
कैलाश गाउँपालिकाले संशोधित बजेट पारित गरेको छ । गाउँपालिकाको बिहिबार बसेको १७ औं गाउँसभाले आन्तरिक स्रोत तर्फबाट सञ्चालित २ करोड ५१ लाख रुपैयाँ संशोधित बजेट पारित गरेको हो ।
गाउँपालिका उपाध्यक्ष बालकुमार मल्लले सभामा पेश गरेको उक्त बजेट कार्यक्रमलाइ अध्यक्ष लोक बहादुर मुक्तानले निर्णायार्थ पेश गर्नुभएको थियो । अध्यक्ष मुक्तानले पेश गरेको उक्त बजेट कार्यपापलिका सदस्यहरुले सर्वसम्मत रुपमा पारित गर्नुभएको हो ।
कैलाशले चालु तर्फ आन्तरिक स्रोत तर्फबाट ९ करोड ४२ लाख रुपैयाँ, पुँजीगत तर्फ १५ करोड ४८ लाख रुपैयाँ सहित कुल २४ करोड ९१ लाख रुपैयाँ संशोधित बजेट कार्यान्वयनमा लाने भएको छ । गाउँपालिकाले आन्तरिक स्रोतबाट २ करोड ५१ लाख रुपैयाँ बजेट थप गरेको हो ।
यसअघि गत असार १० मा गाउँपालिकाले ५४ करोड २९ लाख रुपैयाँ बजेट ल्याएको थियो । कैलाशले उक्त बजेटमा समावेश भएको विशेष तथा सशर्त अनुदान वापतको रकम भने संशोधन गरेको छैन ।
कैलाशले १७ वटा आयोजनाहरु कटौति तथा हटाएको छ भने ४३ वटा योजनाहरु थप गरेको छ । १४ योजनामा रकम घटाउनुको साथै ४ योजनामा रकम थप गरेको छ ।
सभामा विद्यायन समितिका संयोजक भूवन सिं घलानले गाउँपालिकाको आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयक, गाउँपालिकाको बेरुजु फस्र्यौट कार्यविधि ०८२, गाउँपालिकाको लेखा समिति गठन तथा सञ्चालन कार्यविधि र गाउँसभा सचिवालय स्थापना तथा कार्य सञ्चालन कार्यविधि प्रस्तुत गर्नुभएको थियो ।
त्यस्तै, उपाध्यक्ष बालकुमार मल्ल ठकुरीले चालु आर्थिक वर्षको विनियोजन ऐन, बजेट तथा कार्यक्रमको संशोधित अनुमान विभिन्न एजेन्डाका विषय प्रस्तुत गर्नुभएको थियो ।
सभामा पालिका कार्य सम्पादनमा महत्वपूर्ण योगदान पु¥याउने स्वास्थ्यकर्मी, प्रशासन तथा प्राविधिक, शिक्षक, विद्यार्थी,सञ्चारकर्मी, निर्माण व्यवसायी, उपभोक्ता समिति, र उद्यमीलाई समेत सम्मान गरिएको थियो ।
